तास खेलिरहेको स्थानमा प्रहरी पुगेपछि भागदौड, एक जनाको मृत्यु

विराटनगर । विराटनगरमा तास खेलिरहेको स्थानमा प्रहरी पुगेपछि भएको भागदौडका क्रममा पक्राउ परेका एक व्यक्तिको उपचारका क्रममा मृत्यु भएको छ। घटनामा अर्का एक व्यक्ति घाइते भएका छन्।

सोमबार राति करिब ११ः३० बजे विराटनगर महानगरपालिका–६ सरोचियास्थित लालु पासवानको घरमा केही व्यक्ति तास खेलिरहेको अवस्थामा प्रहरीको गस्ती टोली पुगेको थियो। प्रहरी देखेपछि त्यहाँ रहेका व्यक्तिहरू भाग्न खोज्दा दुर्घटना भएको बताइएको छ।

घटनापछि प्रहरीले आठ जनालाई नियन्त्रणमा लिएको थियो। पक्राउ पर्नेमा विराटनगर–१४ का ५५ वर्षीय बलराम कोइराला पनि थिए। भाग्ने क्रममा सामान्य चोट लागेका कोइरालालाई प्रहरीका अनुसार प्रारम्भिक स्वास्थ्य परीक्षणपछि सामान्य अवस्थामा रहेको देखिएको थियो।

प्रहरीका अनुसार कोइरालासहित सात जनालाई त्यस रात हिरासतमा राखिएको थियो। मंगलबार बिहान करिब ७ः३० बजे कोइराला हिरासतभित्र अचेत अवस्थामा फेला परेका थिए। उनलाई उपचारका लागि तत्काल कोशी अस्पताल लगिए पनि त्यहाँ उपचार सम्भव नभएपछि नोबेल शिक्षण अस्पताल पुर्‍याइएको थियो।

नोबेल शिक्षण अस्पतालका चिकित्सकले मंगलबार बिहान करिब ११ बजे कोइरालालाई मृत घोषणा गरेका थिए। उनको शव हाल अस्पतालमै रहेको प्रहरीले जनाएको छ।

मोरङ प्रहरीका सूचना अधिकारी डीएसपी मकेन्द्रकुमार मिश्रका अनुसार कोइरालाको मृत्युको यकिन कारण तत्काल खुलिसकेको छैन। उनका अनुसार कोइरालाको यसअघि टाउकाको शल्यक्रिया भएको जानकारी पनि प्राप्त भएको छ।

यसै घटनामा विराटनगर–८ का ४१ वर्षीय चन्दन मुखिया भने दुई तलामाथिबाट हामफाल्दा घाइते भएका छन्। उनको दाहिने खुट्टामा चोट लागेपछि उपचार भइरहेको छ। उनी एम्बुलेन्स चालक रहेको प्रहरीले जनाएको छ।

प्रहरीका अनुसार गस्ती टोली त्यहाँ पुग्दा तास खेलिरहेको जानकारी पहिले नै प्राप्त भएको थिएन। प्रहरीको उपस्थितिपछि भाग्ने क्रममा मुखियाले घरको माथिल्लो तलाबाट हामफालेका थिए।

प्रहरीले घटनास्थलबाट कोइराला र मुखियासहित धनपालथान गाउँपालिका–६ का ३३ वर्षीय साजन राजवंशी, विराटनगर–४ का ५२ वर्षीय सत्यनारायण राजवंशी, ४८ वर्षीय तोरण यादव, विराटनगर–६ का २६ वर्षीय राजेश कामत, ५३ वर्षीय गंगाराम मण्डल र ४३ वर्षीय विष्णु कामतलाई नियन्त्रणमा लिएको जनाएको छ।

उनीहरूबाट ४८ हजार ३९५ रुपैयाँ नगद समेत बरामद भएको प्रहरीले जनाएको छ।

घटनामा मृत्यु भएका कोइरालाको मृत्युको कारण र भागदौडका क्रममा भएको घटनाबारे थप विवरण अनुसन्धानपछि स्पष्ट हुने प्रहरीले जनाएको छ।