हुम्ला — केही दिनदेखि परेको हिमपातका कारण अवरुद्ध बनेको सिमकोट–हिल्सा सडकमा यातायात सञ्चालन सहज बनाउन हिउँ हटाउने काम सुरु गरिएको छ।
असोज ९ देखि ११ गतेसम्म भएको हिमपातका कारण सडकका विभिन्न खण्डमा बाक्लो हिउँ जमेको थियो। हिमपात रोकिएसँगै मंगलबारदेखि सुरक्षाकर्मी परिचालन गरेर सडकमा जमेको हिउँ पन्छाउने काम थालिएको जिल्ला प्रहरी कार्यालय हुम्लाले जनाएको छ।
जिल्ला प्रहरी कार्यालय हुम्लाका प्रमुख प्रहरी नायब उपरीक्षक (डीएसपी) शंकर खड्काका अनुसार मौसममा सुधार आएपछि सडक खुलाउने उद्देश्यले सुरक्षाकर्मीलाई परिचालन गरिएको हो। बाक्लो हिउँका कारण सडकमा सवारीसाधन सञ्चालन गर्न समस्या भइरहेको छ।
सिमकोट–हिल्सा सडक उत्तरी हुम्लालाई जिल्ला सदरमुकाम सिमकोटसँग जोड्ने महत्वपूर्ण सडक मार्ग हो। सडक अवरुद्ध भएपछि उत्तरी क्षेत्रका बासिन्दा तथा यात्रुको दैनिक आवतजावत प्रभावित भएको छ।
सडकबाट हिउँ हटाएर यातायात पुनः सञ्चालनमा ल्याउने प्रयास भइरहेको प्रहरीले जनाएको छ। सडक पूर्ण रूपमा खुलेपछि उत्तरी हुम्लाका स्थानीयवासीलाई आवतजावत तथा दैनिक आवश्यक सामग्रीको ओसारपसारमा सहज हुने अपेक्षा गरिएको छ।