नेपाली कम्युनिष्ट पार्टीका सांसद महेन्द्रबहादुर शाहीले सरकारले आफ्नो कार्यशैली परिवर्तन गर्नुपर्ने बताउनुभएको छ ।
प्रतिनिधि सभाको बुधबार बसेको बैठकमा बोल्दै सांसद शाहीले सरकार आफ्नो मार्गबाट विचलित हुँदै गए गम्भीर परिणाम भोग्नुपर्ने अवस्था आउन सक्ने चेतावनी दिनुभयो । उहाँले सरकारलाई सही मार्गमा फर्किन र परिपक्वतापूर्वक काम गर्न आग्रह गर्नुभयो ।
सांसद शाहीले राजधानी काठमाडौंलाई कर्णालीसँग जोड्ने मुख्य राजमार्ग तथा करिडोरमा भइरहेको अवरोधप्रति सरकारको ध्यानाकर्षण गराउनुभयो । कर्णालीका नागरिक पटक–पटक बाढी र पहिरोको चपेटामा पर्दासमेत राज्यले समस्यालाई गम्भीर रूपमा नलिएको उहाँको आरोप थियो ।
उहाँका अनुसार कालिकोटका गगने खोला, एस मोड, खल्लागाड र राजुली क्षेत्रमा पटक–पटक पहिरो खस्दा जनजीवन प्रभावित भइरहेको छ । चाडपर्वको समयमा समेत नागरिकलाई घर फर्किन कठिनाइ भइरहेको भन्दै उहाँले तत्काल मेसिन तथा प्राविधिक जनशक्ति परिचालन गरी सडक सञ्चालनमा ल्याउन सरकारसँग माग गर्नुभयो ।
सांसद शाहीले पहिरो पन्छाउने काम मात्र पर्याप्त नहुने भन्दै कर्णाली राजमार्गका जीर्ण सेफ्टी बारहरू तत्काल फेर्न र जोखिमयुक्त स्थानमा आधुनिक सुरक्षा संरचना निर्माण गर्न सरकारको ध्यानाकर्षण गराउनुभयो ।