काठमाडौं । उपप्राध्यापक तथा नेपाल प्रज्ञा प्रतिष्ठानकी प्राज्ञ डा. अस्मिता बिष्टको पहिलो निबन्ध संग्रह ‘समय सालामा नृत्यमग्न आकृति’ सार्वजनिक गरिएको छ। मंगलबार धरानमा आयोजित समारोहमा उक्त कृति लोकार्पण गरिएको हो।
महेन्द्र बहुमुखी क्याम्पस, धरानको अंग्रेजी विभागले आयोजना गरेको कार्यक्रममा विराटनगर प्रज्ञा प्रतिष्ठानका अध्यक्ष विवश पोखरेल प्रमुख अतिथिका रूपमा उपस्थित थिए। कार्यक्रममा प्रा. डा. गोपालप्रसाद भण्डारी, प्रा. डा. खेमनाथ दाहाल र सहप्रा. डा. मोहन तुम्बाहाङलगायत साहित्य तथा प्राज्ञिक क्षेत्रका व्यक्तिहरूको सहभागिता थियो।
कृतिमाथि टिप्पणी गर्दै महेन्द्र बहुमुखी क्याम्पसको नेपाली विभागका प्रमुख उपप्राध्यापक डा. दीपकप्रसाद न्यौपानेले संग्रहमा समेटिएका १७ वटा निजात्मक निबन्धको चर्चा गरे। उनले निबन्धको सैद्धान्तिक मापदण्डका आधारमा कृतिलाई उत्कृष्ट रहेको मूल्यांकन गरे।
त्यस्तै, समीक्षक प्राध्यापक डा. इन्दिरा मिश्रले परिवृत्त चेतनाको प्रयोग, मातृत्व, नारीवादी चेतना र शिल्पसौन्दर्यजस्ता पक्षलाई संग्रहको विशेषताका रूपमा औँल्याइन्। उनका अनुसार यी पक्षका दृष्टिले कृति नेपाली निबन्ध परम्पराकै उत्कृष्ट कृतिमध्ये पर्छ।
लोकार्पण समारोहमा लेखक र श्रोताबीच अन्तरक्रिया पनि गरिएको थियो। सो क्रममा निबन्धकार डा. बिष्टले आफू समीक्षा र सिर्जना दुवै क्षेत्रमा सक्रिय रहे पनि समीक्षाभन्दा सिर्जनात्मक लेखनमा बढी रमाउने गरेको बताइन्।
कक्षा पाँचदेखि नै कविता लेख्न थालेको स्मरण गर्दै उनले आगामी दिनमा पनि कविता र निबन्ध लेखनलाई निरन्तरता दिने प्रतिबद्धता व्यक्त गरिन्।