सञ्जय मिश्रा
रौतहट, ८ कात्तिक । भारतको बिहारस्थित रक्सौलमा नेपालतर्फ तस्करी गरी लैजान लागिएको करिब ४ करोड भारतीय रुपैयाँ बराबरको ब्राउन सुगरसहित दुई जना पक्राउ परेका छन्।
भारतको पूर्वी चम्पारण जिल्लाअन्तर्गत रक्सौलस्थित लक्ष्मीपुर चेकपोस्ट नजिक प्रहरीले शनिबार अपराह्न छापा मारेर १ किलो ८०६ ग्राम लागूऔषध बरामद गरेको हो। लागूऔषध तस्करीविरुद्धको विशेष कार्यदल (एसटीएफ) र प्रहरीको संयुक्त टोलीले गरेको कारबाहीमा तस्करीमा प्रयोग गरिएको स्कोर्पियो गाडीसहित दुई जनालाई नियन्त्रणमा लिइएको भारतीय प्रहरीले जनाएको छ।
पक्राउ पर्नेमा रक्सौल निवासी रमेश कुमार र पलनवा थाना क्षेत्रको बहुअर्वा निवासी सन्दीप कुमार रहेका छन्।
मोतीहारीका प्रहरी उपरीक्षक (एसपी) स्वर्ण प्रभातलाई गोरखपुरबाट स्कोर्पियो गाडीमा ठूलो परिमाणमा ब्राउन सुगर ल्याएर रक्सौल हुँदै नेपालतर्फ लैजान लागिएको गोप्य सूचना प्राप्त भएको थियो। सोही सूचनाका आधारमा उनले मोतीहारी र रक्सौलका प्रहरी सम्मिलित संयुक्त टोली परिचालन गरेका थिए।
कारबाहीका क्रममा प्रहरीले लागूऔषधका साथै स्कोर्पियो गाडी, दुई थान मोबाइल र सुनजस्तो देखिने धातुको एउटा लकेटसमेत बरामद गरेको छ। बरामद लागूऔषधको अनुमानित बजार मूल्य करिब ४ करोड भारतीय रुपैयाँ रहेको प्रहरीको भनाइ छ।
प्रहरीका अनुसार पक्राउ परेका सन्दीप कुमार यसअघि पनि रक्सौल थाना क्षेत्रमा दर्ता भएको लागूऔषधसम्बन्धी मुद्दामा संलग्न रहेको खुलेको छ। घटनाबारे प्राथमिकी (एफआईआर) दर्ता गरी थप अनुसन्धान अघि बढाइएको छ।
बरामद लागूऔषध कहाँबाट ल्याइएको थियो, नेपालमा कसलाई र कहाँ पुर्याउने योजना थियो तथा यस कारोबारमा अन्य व्यक्तिको संलग्नता छ वा छैन भन्ने विषयमा प्रहरीले अनुसन्धान गरिरहेको छ।
उक्त कारबाहीको नेतृत्व अनुमण्डल प्रहरी पदाधिकारी मनीष आनन्दले गरेका थिए। टोलीमा प्रखण्ड कृषि पदाधिकारी गौतम कुमार, प्रहरी निरीक्षक निर्भय कुमार राय, रक्सौल थाना प्रमुख रमेश कुमार महतोसहितका सुरक्षाकर्मी, एसटीएफ मोतीहारीको टोली तथा सशस्त्र सीमा बलका सुरक्षाकर्मी सहभागी थिए।
मोतीहारीका एसपी स्वर्ण प्रभातको नेतृत्वमा यसअघि पनि जिल्लाका विभिन्न स्थानमा लागूऔषधविरुद्ध कडा कारबाही गरिएको भारतीय प्रहरीले जनाएको छ। प्राप्त विवरणअनुसार विभिन्न समयमा गरिएका कारबाहीमा ६४ करोड भारतीय रुपैयाँभन्दा बढी मूल्यका लागूऔषध बरामद गर्नुका साथै कारोबारमा संलग्न भएको आरोपमा एक सयभन्दा बढी व्यक्तिलाई पक्राउ गरिएको छ।
यस घटनाले नेपाल–भारत सीमावर्ती क्षेत्रमा लागूऔषध तस्करी नियन्त्रणका लागि भारतीय सुरक्षा निकायले निगरानी र कारबाहीलाई तीव्र बनाएको देखाउँछ।