९ कात्तिक, काठमाडौं। काठमाडौं उपत्यकामा प्रहरीले पछिल्लो २४ घण्टामा विभिन्न कसुरमा संलग्न रहेको आरोपमा ११८ जनालाई नियन्त्रणमा लिएको छ। काठमाडौं उपत्यका प्रहरी कार्यालयका अनुसार काठमाडौं जिल्लाबाट ९९ जना, भक्तपुरबाट १७ जना र ललितपुरबाट दुई जना पक्राउ परेका हुन्।
प्रहरी कार्यालयले नियन्त्रणमा लिइएका व्यक्तिमाथि विभिन्न कसुरमा अनुसन्धान भइरहेको जनाएको छ।
यसैबीच, सोही अवधिमा उपत्यकामा ट्राफिक नियम उल्लङ्घन गर्ने ५१४ जना चालकलाई प्रहरीले कारबाही गरेको छ।
कारबाहीमा पर्नेमा मादक पदार्थ सेवन गरी सवारी चलाउने ६४ जना, लागुपदार्थ सेवन गरी सवारी चलाउने दुई जना, तीव्र गतिमा सवारी चलाउने ४० जना र रातो बत्ती उल्लङ्घन गर्ने २१ जना रहेका छन्।
अन्य चालकलाई विभिन्न ट्राफिक नियम उल्लङ्घन गरेको कसुरमा कारबाही गरिएको प्रहरीले जनाएको छ।