राप्रपाका शीर्ष नेताहरू जिल्ला दौडाहामा, वीरगञ्जबाट सुरु हुने भ्रमण झापामा टुङ्गिने
काठमाडौं । राष्ट्रिय प्रजातन्त्र पार्टी (राप्रपा)का पूर्वअध्यक्षद्वय डा. प्रकाशचन्द्र लोहनी र कमल थापासहित वरिष्ठ उपाध्यक्ष विक्रम पाण्डे तथा अन्य नेताहरू जिल्ला भ्रमणमा निस्कने भएका छन्।
नेता राजाराम बर्तौलाका अनुसार कात्तिक ११ गते पर्साको वीरगञ्जबाट सुरु हुने भ्रमण बारा, रौतहट, सर्लाही, महोत्तरी, धनुषा, सिरहा, सप्तरी, सुनसरी र मोरङ हुँदै झापामा पुगेर समापन हुनेछ।
राप्रपाले आगामी मंसिरमा पार्टीको महाधिवेशन गर्ने तयारी गरिरहेका बेला नेताहरू जिल्ला भ्रमणमा जान लागेका हुन्। भ्रमणका क्रममा देशको पछिल्लो राजनीतिक अवस्था, वर्तमान परिस्थितिमा पार्टीको भूमिका तथा सङ्गठनलाई थप सुदृढ बनाउने विषयमा छलफल र अन्तरक्रिया गरिने जनाइएको छ।
पार्टीका अनुसार हालसम्म ७५ जिल्ला अधिवेशन र पाँच प्रदेश कार्यसमितिका अधिवेशन सम्पन्न भइसकेका छन्। राप्रपाले सदस्यता वितरण तथा नवीकरणका लागि कात्तिक १८ गतेसम्मको समयसीमा तोकेको छ।