भारतमा हत्या प्रकरणका मुख्य आरोपी अदालत परिसरबाटै फरार, प्रहरीको सुरक्षा व्यवस्थामाथि प्रश्न
रौतहट, १२ कात्तिक । भारतको बिहारस्थित मोतिहारी जिल्ला अदालत परिसरबाट चर्चित जिल्ला पार्षद सुरेश यादव हत्या प्रकरणका मुख्य आरोपी हरिशंकर पासवान फरार भएका छन्। बुधबार अदालतमा पेस गरेर फर्काउने क्रममा प्रहरीको सुरक्षा घेरा तोड्दै पासवान फरार भएपछि प्रहरी प्रशासनमा हलचल मच्चिएको छ।
भारतीय सञ्चारमाध्यममा प्रकाशित विवरणअनुसार, अतिरिक्त जिल्ला एवं सत्र न्यायाधीश (एडीजे–५) को अदालतमा पेस गरेपछि फर्काउने क्रममा पासवानले प्रहरीलाई छल्दै हतकडीबाट हात निकालेर भागेका हुन्। अदालत परिसरमा भएको भीडभाडको फाइदा उठाएर उनी फरार भएको बताइएको छ।
सुगौली क्षेत्रको मधुमालत निवासी पासवान बन्जरियाका जिल्ला पार्षद सुरेश यादवको हत्याका मुख्य आरोपी हुन्। सन् २०२४ जुन २६ मा चाँदमारी चोकमा यादवको दिनदहाडै हत्या भएको थियो। उक्त घटनामा पासवानमाथि मुख्य आरोपीका रूपमा अभियोग लगाइएको छ।
अदालत परिसरबाटै हत्या अभियोगका मुख्य आरोपी फरार भएपछि प्रहरीको सुरक्षा व्यवस्थामाथि गम्भीर प्रश्न उठेको छ। कडा निगरानी रहने न्यायालय परिसरबाट कैदी फरार हुनुले सुरक्षा व्यवस्थामा रहेको कमजोरीसमेत उजागर गरेको छ।
कारागार अधीक्षकका अनुसार प्रहरी जवान निरञ्जन कुमारको जाहेरीका आधारमा नगर थानामा घटनासम्बन्धी प्राथमिकी (एफआईआर) दर्ता गरिएको छ। फरार कैदीको खोजीका लागि प्रहरीका विभिन्न टोली परिचालन गरिएको छ। साथै, जिल्लाका विभिन्न स्थानमा व्यापक खोजतलास र छापा मार्ने काम भइरहेको जनाइएको छ।
कडा सुरक्षाबीच कैदी कसरी फरार भए?
अदालतमा पेस गरिएका कैदीलाई सुरक्षित रूपमा कारागार फर्काउने जिम्मेवारी प्रहरीको हुन्छ। तर, हत्या प्रकरणका मुख्य आरोपी नै अदालत परिसरबाट फरार भएपछि सुरक्षामा खटिएका प्रहरीको निगरानी र सुरक्षा व्यवस्थापनमाथि प्रश्न उठेको छ।
घटनापछि प्रहरीले फरार कैदीको खोजी तीव्र पारेको छ। अदालत परिसरजस्तो संवेदनशील स्थानबाट कैदी फरार हुनुले कैदी सुरक्षामा अपनाइने प्रक्रियाको प्रभावकारिताबारे पनि चासो बढाएको छ।