कोप–३१ का अध्यक्ष कुरुमद्वारा जलवायु जोखिम घटाउन तत्काल ठोस कदम चाल्न आह्वान
जलवायु परिवर्तनसम्बन्धी संयुक्त राष्ट्रसंघीय सम्मेलन (कोप–३१) का लागि मनोनीत अध्यक्ष मुरात कुरुमले विश्व समुदायलाई जलवायुजन्य जोखिम कम गर्न तत्काल ठोस कदम चाल्न आह्वान गरेका छन्।
फिजीको नाडीमा आयोजित पूर्व–सम्मेलनमा बोल्दै उनले अबका छलफलहरू नीतिगत बहसभन्दा माथि उठेर कार्यान्वयनयोग्य परियोजनामा केन्द्रित हुनुपर्नेमा जोड दिएका छन्। टर्कीका वातावरण, सहरीकरण तथा जलवायु परिवर्तनमन्त्रीसमेत रहेका कुरुमले १.५ डिग्री सेल्सियसको विश्वव्यापी तापमान वृद्धिको सीमा नाघ्नु गम्भीर संकटको संकेत भएको औंल्याएका छन्।
यद्यपि, यो सीमा नाघ्दैमा जलवायु प्रयासहरू अन्त्य नहुने बताउँदै उनले वर्तमानमा लिइने निर्णयहरूले नै भविष्यको परिणाम निर्धारण गर्ने स्पष्ट पारेका छन्।
कुरुमले भने, ‘अब हामीले के गर्ने भन्ने सैद्धान्तिक बहसबाट माथि उठेर वैज्ञानिक तथ्यहरूलाई ठोस नीतिमा, नीतिलाई परियोजनामा र परियोजनालाई मापनयोग्य नतिजामा रूपान्तरण गर्नुपर्ने बेला आएको छ।’
उनको नेतृत्वमा टर्कीले १.५ डिग्रीको लक्ष्यलाई जीवित राख्न दीर्घकालीन संयन्त्र निर्माण गर्ने अठोट गरेको छ। बैठकले विश्वका ५० भन्दा बढी मुलुकका मन्त्री र जलवायु वार्ताकारहरूलाई एकै ठाउँमा ल्याएको छ।
यस भेलाले औपचारिक वार्ताअघि विभिन्न राष्ट्रका प्राथमिकता र विवादका विषयहरू पहिचान गरी सहमति जुटाउने आधार तय गर्ने लक्ष्य राखेको छ। बैठकमा जलवायु वित्तमा पहुँच, महासागर र जलवायुबीचको अन्तरसम्बन्ध तथा नवीकरणीय ऊर्जातर्फको संक्रमणजस्ता मुख्य मुद्दाहरूमा गहन छलफल भइरहेको छ।
सहभागी राष्ट्रहरूले कोप–३१ लाई जलवायु एजेण्डाको एउटा ‘टर्निङ प्वाइन्ट’ बनाउने प्रतिबद्धता व्यक्त गरेका छन्।