काठमाडौं, २२ असोज । आईसीसी एकदिवसीय विश्व वरीयतामा नेपाल १६औँ स्थानमा उक्लिएको छ । पुरुष एकदिवसीय वरीयतामा नेपाल एक स्थान सुधार गर्दै १६औँ स्थानमा पुगेको हो ।
अन्तर्राष्ट्रिय क्रिकेट परिषद् (आईसीसी) ले बिहीबार सार्वजनिक गरेको विवरणअनुसार नेपालले ३३ खेलबाट ९३९ अंकसहित २८ रेटिङ प्राप्त गरेको छ । २४ खेल खेलेको नामिबियाले ६७६ अंक जोडेको छ । दुवै टोलीको रेटिङ समान २८ छ ।
नेपालभन्दा अघि अमेरिका १५औँ स्थानमा छ भने नेपालपछि नामिबिया १७औँ स्थानमा रहेको छ । सूचीमा अन्य टोलीको स्थान यथावत् छ । यसअघि नेपाल टी–२० विश्व वरीयतामा १३औँ स्थानमा उक्लिएको थियो ।