काठमाडौँ, २३ असोज । नेपाली कांग्रेसका सभापतिका उम्मेदवार गगनकुमार थापाले मतदातासँग मत मागेका छन् । लाइनमा बसेका मतदातासँग उनले मत मागेका हुन् ।
पार्टीको १५औँ महाधिवेशन गत वर्षको मंसिरमै गर्ने निर्णय केन्द्रीय कार्यसमितिले गत वर्षको असोजमै गरेको भए पनि नेतृत्वले आलटाल गरेपछि पार्टीलाई विधिको शासनमा डोर्याउन विशेष महाधिवेशन गराएर संविधानसम्मत बनाएपछि थापा नेतृत्वमा आएका थिए ।
उनकै नेतृत्वमा पार्टी गत फागुन २१ गतेको प्रतिनिधिसभा निर्वाचनमा होमिएको थियो । उनले यसपालि पनि समयमै महाधिवेशन गराएर पार्टीलाई विधानसम्मत नै अगाडि बढाएका छन् । उनले मत मागिरहँदा मतदाता भने निकै उत्साही देखिए ।
उनीसँग काठमाडौँ–६ का श्यामकृष्ण खड्गीले सभापतिमा प्रतिस्पर्धा गरेका छन् । खड्गी पहिलो पटक केन्द्रीय कार्यसमितिमा चुनाव लडिरहेका हुन् ।
लामो समयदेखि कांग्रेस राजनीतिमा रहेका गगन थापा भने पहिलो पटक केन्द्रीय सदस्य हुँदा सर्वाधिक मतसहित शीर्ष स्थानमा रहेर चुनाव जितेका थिए । उनी यसअघि महामन्त्रीसमेत भएका थिए ।
जेन–जी आन्दोलनपछि पार्टी नीति पनि समाज सुहाउँदो परिवर्तन गर्दै लैजानुपर्छ भन्दै अग्रसर भएका थापाले विशेष महाधिवेशन सफल पारी पार्टीलाई यहाँसम्म डोर्याएर ल्याएका छन् ।
उनले मतदातालाई कसैको भड्काउमा नपरी स्वेच्छाले मतदान गर्न आग्रह गरेका छन् । उनले बिहान मात्रै सामाजिक सञ्जालमा लेख्दै कुनै समूह नबनेको भन्दै बिनादबाब मतदान गर्न आग्रह गरेका हुन् ।