२५ असोज, काठमाडौं । नेकपा एमालेका अध्यक्ष केपी शर्मा ओलीले विपद् व्यवस्थापनमा सरकार प्रभावकारी रूपमा अघि बढ्न नसकेको भन्दै आलोचना गरेका छन्।
गोरखाको बूढीगण्डकी नदीमा आएको बाढीपछि उत्पन्न परिस्थितिबारे सरकारको ध्यानाकर्षण गराउँदै ओलीले राष्ट्रिय संकटका बेला पनि सरकारले उदारता देखाउन नसकेको आरोप लगाए।
पार्टीको ‘मिसन जागरण’ अभियानअन्तर्गत आइतबार आयोजित अगुवा कार्यकर्ता भेलालाई सम्बोधन गर्दै अध्यक्ष ओलीले सरकारी स्रोतसाधनको उचित प्रयोग हुन नसकेको बताए। विपद्का बेला सरकारी हेलिकोप्टरको प्रयोगमा अनियमितता भएको संकेत गर्दै उनले सरकारी हेलिकोप्टरलाई कुनै संस्थाको निजी साधनजस्तो गरी प्रयोग गरिएको टिप्पणी गरे। उनका अनुसार हेलिकोप्टर चढ्ने अवसर नपाएकाहरूलाई अवसर दिलाएजस्तो गरी यसको प्रयोग गरिएको थियो।
यसअघि भोटेकोशी र त्रिशूली नदीमा आएको बाढीका समयमा पनि उद्धारका लागि प्रयोग गरिने हेलिकोप्टरको दुरुपयोग भएको ओलीले स्मरण गराए। त्यतिबेला सरकारले हेलिकोप्टरको प्रयोगलाई व्यवस्थित गर्न नसकेको र राहत तथा उद्धारका काम समयमै अघि नबढाएको उनको भनाइ थियो। आगामी दिनमा यस्ता कमजोरी नदोहोर्याउन उनले सरकारलाई आग्रह गरे।
विपद् व्यवस्थापनजस्तो संवेदनशील विषयमा सरकारले व्यापक सोच राख्न नसकेको ओलीले बताए। संकटको समयमा सबै राजनीतिक दल र सरोकारवाला पक्षलाई सहभागी गराएर संयुक्त समिति गठन गर्न नसक्नु सरकारको कमजोरी भएको उनको टिप्पणी थियो।
ओलीले उद्धार तथा राहतका कामलाई प्रभावकारी बनाउन सरकारले सबै पक्षलाई समेटेर अघि बढ्नुपर्नेमा जोड दिए। राष्ट्रिय संकटको अवस्थामा समेत सर्वदलीय समिति गठन गर्न नसक्नुले सरकारको साँघुरो सोच उजागर गरेको उनले बताए।
त्यस्तै, अन्तर्राष्ट्रिय समुदायबाट प्राप्त सहयोगलाई समयमै स्वीकार गरी प्रभावकारी रूपमा परिचालन गर्न नसक्दा उद्धार कार्यमा समस्या आएको ओलीले दाबी गरे।
विदेशी सहयोगको उचित उपयोग हुन नसकेको र सहयोग स्वीकार गर्न ढिलाइ हुँदा उद्धार अभियान प्रभावित भएको उनले बताए। यसकै कारण समयमै उद्धार हुन नसक्दा धेरै नागरिकले ज्यान गुमाउनुपरेको हुन सक्ने उनको भनाइ थियो।
सरकारको भरमा मात्र नपरी विपद् प्रभावितको सहयोगमा जुट्न ओलीले पार्टीका नेता तथा कार्यकर्तालाई निर्देशन दिएका छन्। बूढीगण्डकी क्षेत्रमा आएको बाढीले घरहरू बगाएको, केही व्यक्ति बेपत्ता भएको र ठूलो क्षति पुर्याएको उल्लेख गर्दै उनले तत्काल उद्धार तथा राहतका काममा सक्रिय हुन आग्रह गरे।
ओलीले विपद् प्रभावित नागरिकलाई सहयोग गर्न, आवश्यकताअनुसार पुनर्निर्माणका कार्यमा सहभागी हुन र विस्थापित परिवारको पुनःस्थापनाका लागि योगदान दिन पार्टीका सम्पूर्ण नेता तथा कार्यकर्तालाई आह्वान गरेका छन्।