सभापतिलाई कमजोर पार्ने प्रयास भएको दाबी, पक्राउ गर्ने तयारी भए सशक्त प्रतिवाद गर्ने चेतावनी
रुपन्देही । नेपाली कांग्रेसका केन्द्रीय सदस्य प्रचण्डविक्रम न्यौपानेले पार्टी सभापति गगनकुमार थापामाथि लगाइएका आरोपलाई निराधार भन्दै त्यसलाई पार्टी कमजोर बनाउने योजनाका रूपमा व्याख्या गरेका छन्।
उनले सभापति थापालाई लक्षित गरेर भइरहेको आरोप–प्रत्यारोपले सिंगो कांग्रेसमाथि प्रहार गर्ने प्रयास भएको बताए। यस्तो गतिविधि पार्टीका लागि स्वीकार्य नहुने उल्लेख गर्दै उनले त्यसविरुद्ध कांग्रेस एकजुट भएर उभिने दाबी गरे।
न्यौपानेले थापामाथि लगाइएका आरोप प्रमाणित गर्न चुनौती दिँदै आवश्यक अनुसन्धानका लागि पार्टी तयार रहेको स्पष्ट पारे। तर, नियोजित रूपमा कसैलाई फसाउने उद्देश्यले राज्यका निकाय परिचालन गर्नु लोकतान्त्रिक मूल्यविपरीत हुने उनको टिप्पणी छ।
सभापति थापालाई पक्राउ गर्ने तयारी भइरहेको भन्ने सूचना सार्वजनिक भएको प्रसङ्ग उल्लेख गर्दै न्यौपानेले त्यस्तो प्रयास भए कांग्रेसले कडा प्रतिवाद गर्ने चेतावनी दिए।
यसैगरी, पार्टीका सहमहामन्त्री अजयबाबु शिवाकोटीलाई साइबर ब्युरोले बोलाएको घटनाप्रति पनि उनले आपत्ति जनाए। उक्त घटनालाई कांग्रेसका नेताहरूलाई लक्षित गर्ने योजनाबद्ध प्रयासका रूपमा आफूले बुझेको उनको भनाइ छ।
‘सभापतिमाथि आरोप लगाएर पार्टीलाई कमजोर पार्ने प्रयास भइरहेको छ। सहमहामन्त्रीलाई समेत नियोजित रूपमा नियन्त्रणमा लिन खोजिएको छ,’ न्यौपानेले दाबी गरे।
पार्टीका नेताहरूमाथि भइरहेका गतिविधिको राजनीतिक मूल्य चुकाउनुपर्ने चेतावनी दिँदै उनले कांग्रेसमाथि हुने कुनै पनि प्रहारको प्रतिवाद गरिने बताए।