काठमाडौं । श्रम संस्कृति पार्टीका सांसद ध्रुवराज राईले प्रधानमन्त्री बालेन्द्र शाहसँग सांसदहरूको प्रत्यक्ष प्रश्नोत्तर कार्यक्रम अझै सञ्चालन हुन नसकेको विषय प्रतिनिधिसभामा उठाएका छन्।
सोमबार बसेको प्रतिनिधिसभा बैठकमा बोल्दै राईले प्रधानमन्त्रीसँग प्रश्नोत्तरका लागि पहिले नै मिति तोकिए पनि निर्धारित समयमा कार्यक्रम हुन नसकेको भन्दै सभामुख डोलप्रसाद अर्यालसँग यसबारे स्पष्ट जानकारी मागेका हुन्।
राईका अनुसार प्रधानमन्त्रीसँग सांसदहरूको प्रश्नोत्तर कार्यक्रम भदौ १० गतेका लागि तय गरिएको थियो। तर तोकिएको मिति बितेको लामो समय भइसक्दा पनि कार्यक्रम आयोजना नभएको भन्दै उनले सरकारको कार्यशैलीप्रति असन्तुष्टि जनाए।
उनले लामो समयदेखि रोकिएको प्रश्नोत्तर कार्यक्रम अब कहिले सञ्चालन हुने हो भन्ने विषयमा संसद्ले स्पष्ट जानकारी पाउनुपर्ने बताए। राईले सरकारलाई संसद् र सांसदहरूप्रति गम्भीर भएर काम गर्नसमेत आग्रह गरे।
बैठकमा राईले पछिल्लो समय देखिएको पक्राउ तथा त्यसपछि हुने रिहाइको प्रक्रियामाथि पनि प्रश्न उठाए। उनले कुनै व्यक्तिलाई नियन्त्रणमा लिनुअघि सम्बन्धित घटनाको गम्भीरता र कानुनी आधारलाई पर्याप्त रूपमा विचार गर्नुपर्ने धारणा राखे।
उनका अनुसार एकातर्फ गम्भीर घटनाका नाममा पक्राउ गर्ने र त्यसको भोलिपल्टै रिहा गर्ने प्रवृत्तिले सरकारी कार्यशैलीमाथि प्रश्न उठ्ने अवस्था सिर्जना गरेको छ। उनले यस्तो प्रक्रियाले राज्यका निकायको कार्यसम्पादनप्रति नागरिकमा समेत प्रश्न उत्पन्न हुन सक्ने बताए।
राईले आफूहरू प्रतिपक्षमा रहे पनि राष्ट्रिय महत्वका विषय र विकास निर्माणका सवालमा सरकारलाई आवश्यक सहयोग गर्दै आएको उल्लेख गरे। तर सरकारका कतिपय निर्णय र कार्यशैलीका कारण प्रतिपक्षमा रहेर रचनात्मक भूमिका निर्वाह गर्नसमेत कठिन भइरहेको उनको भनाइ थियो।
उनले सरकारले आफ्नो कार्यशैली सुधार गर्दै संसद्, सांसद र राष्ट्रिय मुद्दाप्रति थप जवाफदेही बन्नुपर्नेमा जोड दिए।