काठमाडौं । नेपाली कांग्रेसका सभापति गगन थापाले राष्ट्रिय विपत्तिको समयमा देशका सबै राजनीतिक दल सरकारसँगै रहेको बताएका छन्।
बिहीबार बसेको सर्वदलीय बैठकपछि सञ्चारकर्मीसँग कुरा गर्दै थापाले विपत्तिको समयमा राजनीतिक दलहरू एक ठाउँमा उभिएर काम गर्ने परम्परा रहेको बताए। उनले बाढी–पहिरो प्रभावित क्षेत्रमा खोज, उद्धार र तत्काल राहतका लागि राज्यका सबै संयन्त्रसँगै राजनीतिक दल, निजी क्षेत्र तथा सामाजिक संघ–संस्थालाई समेत परिचालन गर्नुपर्नेमा जोड दिए।
बैठकमा गृहमन्त्रीले विपद् प्रभावित क्षेत्रमा राजनीतिक दलका कार्यकर्तालाई परिचालन गर्न आग्रह गरेको जानकारी दिँदै थापाले सरकारको आग्रहअनुसार कांग्रेस आफ्ना कार्यकर्ता परिचालन गर्न तयार रहेको बताए।
उनले प्रभावित क्षेत्रमा सडक सफा गर्ने, खोज तथा उद्धारलगायतका काममा राजनीतिक दलका कार्यकर्तालाई सहभागी गराउनुपर्ने बताए। सरकारले दिएको आवश्यकताअनुसार कांग्रेसले आफ्ना विपद् व्यवस्थापन संरचनामार्फत कार्यकर्ता परिचालन गर्ने जानकारी पनि उनले दिए।
थापाले यति ठूलो प्राकृतिक विपत्तिपछि सरकारसँग मात्र उपलब्ध स्रोत र साधनबाट उद्धार तथा राहत कार्य प्रभावकारी रूपमा अघि बढाउन कठिन हुने बताए। त्यसैले निजी क्षेत्र, राजनीतिक दल तथा सामाजिक संघ–संस्थालगायत सबै पक्षलाई राज्यले आवश्यकताअनुसार परिचालन गर्नुपर्ने उनको भनाइ छ।
राहत तथा सहयोगलाई व्यवस्थित बनाउन राज्यले तोकेको ‘एकद्वार प्रणाली’मार्फत सहयोग गर्न सबै सहयोगी पक्षलाई उनले आग्रह गरे।
थापाले कांग्रेसले पनि बाढी प्रभावित क्षेत्रमा उद्धार, राहत तथा पुनःस्थापनाका लागि सरकारी कोषमा आवश्यक रकम सहयोग गर्ने जानकारी दिए।
उनले विपत्तिको यो समयमा सबै पक्षले राजनीतिक तथा अन्य विभाजनभन्दा माथि उठेर नागरिकको जीवन रक्षा र राहतमा केन्द्रित हुनुपर्ने बताए।